पुणे: सुनेला पेटवून देणाऱ्या सासू आणि नणंदेला दोषी ठरवत जन्मठेपेची शिक्षा सुनावली. अतिरिक्त सत्र न्यायाधीश प्रभाकर जाधव यांनी या प्रकरणी निकाल दिला.

ममता विजय चव्हाण (वय ४८, रा. श्रमिकनगर, मंगळवार पेठ) आणि रिटा उर्फ गौरी संतोष वाल्मिके (वय ३४, रा. जयजवाननगर) अशी शिक्षा सुनावलेल्यांची नावे आहेत.

स्वयंपाक करण्यावरुन झालेल्या वादातून सासू ममता आणि नणंद रिटा यांनी सून दीपाली अमित चव्हाण (वय २८) हिला शिवीगाळ करत अंगावर रॉकेल ओतून पेटवून दिले होते. १ नोव्हेंबर २०२३ रोजी ही घटना घडली होती. गंभीर भाजलेल्या दीपालीला पती अमितने ससून रुग्णालयात दाखल केले होते. फरासखाना पोलीस ठाण्यातील सहायक निरीक्षक परशुराम शिंदे यांनी ससून रुग्णालयात दीपालीचा वैद्यकीय तज्ज्ञांच्या उपस्थितीत जबाब नोंदवून घेतला होता. गंभीर भाजल्याने दीपालीचा ३ नोव्हेंबर रोजी ससून रुग्णालयात मृत्यू झाला होता.

पोलिसांनी या प्रकरणी फरासखाना पोलीस ठाण्यात गुन्हा दाखल करत सासू ममता आणि नणंद रिटा यांना अटक केली होती. सरकार पक्षाकडून अतिरिक्त सरकारी वकील नामदेव तरळगट्टी यांनी बाजू मांडली. सरकार पक्षाकडून आठ साक्षीदारांची साक्ष नोंदविण्यात आली. साक्ष, तसेच मृत्यपूर्व जबाब ग्राह्य अतिरिक्त सत्र न्यायाधीश प्रभाकर जाधव यांनी आरोपी सासू आणि नणंदेला जन्मठेप आणि २५ हजार रुपये दंडाची शिक्षा सुनावली.