पुणे शहरातील अपघातांचे सत्र सुरूच आहे. हडपसर-सासवड रस्त्यावर भरधाव कंटेनरने धडक दिल्याने मोटार चालक तरुणाचा दुर्दैवी मृत्यू झाल्याची घटना घडली. याप्रकरणी काळेपडळ पोलिसांनी कंटेनर चालकाविरुद्ध गुन्हा दाखल केला.

अक्षय बाळासाहेब चिव्हे (वय ३१, रा. फुरसुंगी, सासवड रस्ता) असे मृत्युमुखी पडलेल्या मोटारचालकाचे नाव आाहे.या प्रकरणी बाळासाहेब महादेव चिव्हे (वय ५९, रा. संयोग कॉलनी, काळेपडळ, हडपसर) यांनी काळेपडळ पोलीस ठाण्यात फिर्याद दिली. त्यांच्या फिर्यादीनुसार, कंटनेर चालकाविरुद्ध गुन्हा दाखल करण्यात आला आहे.

मिळालेल्या महितीनुसार, हडपसर भागातील काळेपडळ परिसरात मृत अक्षय याचे मोबाइल विक्रीचे दुकान आहे. बुधवारी मध्यरात्री अडीचच्या सुमारास अक्षय घरी निघाले होते. हडपसर-सासवड रस्त्यावरुन ते जात होते. त्या वेळी फुरसुंगीतील पॉवर हाऊसजवळ भरधाव मालवाहून कंटेनरने मोटारीला धडक दिली. अपघातात मोटारचालक अक्षय गंभीर जखमी झाले. या अपघाताची माहिती मिळताच पोलिसांनी घटनास्थळी धाव घेतली.

दरम्यान, उपचारांपूर्वीच अक्षय यांचा मृत्यू झाला. पोलीस उपनिरीक्षक विनायक गुरव तपास करत आहेत.