पुणे: स्वारगेट बस स्टँड आणि पुणे रेल्वे स्टेशन परिसरात प्रवाशांचे मोबाईल चोरणाऱ्या सराईत गुन्हेगाराला स्वारगेट पोलिसांनी अटक केली आहे. पोलिसांनी त्याच्याकडून तीन मोबाईल जप्त केले असून, आरोपीच्या माहितीच्या आधारे मोबाईल खरेदी-विक्री करणाऱ्या एका दुकानदाराकडून ४३ मोबाईल आणि एक लॅपटॉप जप्त करण्यात आला आहे.

सतिश ज्ञानेश्वर शिरोळे (वय ३२ वर्षे, रा. पुणे स्टेशन व स्वारगेट बस स्टँड परिसर, मुळगाव – दहीटणे, ता. दौंड, जि. पुणे) असे अटक आरोपीचे नाव आहे.

स्वारगेट पोलीस ठाण्याच्या हद्दीतील बस स्टँड आणि पीएमपीएमएल बस स्टॉप येथे प्रवाशांचे मोबाईल चोरी होण्याच्या घटनांमध्ये वाढ झाली होती. त्यामुळे वरिष्ठ पोलीस निरीक्षक युवराज नांद्रे यांनी परिसरात विशेष गस्त घालण्याच्या सूचना दिल्या होत्या. या सूचनेनुसार पोलीस हवालदार अश्रुबा मोराळे, पोलीस शिपाई सुजय पवार, दिपक खंदाड, फिरोज शेख आणि हनुमंत दुधे यांनी परिसरात गस्त सुरू केली.

२२ जानेवारी रोजी सकाळी आठच्या सुमारास स्वारगेट बस स्टँड परिसरात गस्त घालत असताना, पोलिसांना एक व्यक्ती संशयास्पदरीत्या फिरताना आढळला. पोलिसांनी त्याला हटकले असता, तो पळून जाऊ लागला. मात्र पोलिसांनी वेळीच त्याला पकडून त्याची चौकशी केली. त्यावेळी त्याच्याकडे विवो, रेडमी आणि ओपो कंपनीचे तीन मोबाईल सापडले. ओळखपत्र विचारल्यावर उडवाउडवीची उत्तरे दिल्यामुळे त्याला अधिक चौकशीसाठी पोलीस ठाण्यात आणण्यात आले.

चौकशीदरम्यान आरोपीने स्वारगेट बस स्टँड आणि पुणे स्टेशन परिसरातून मोबाईल चोरी केल्याची कबुली दिली. तपासादरम्यान, आरोपीकडून जप्त करण्यात आलेला विवो कंपनीचा मोबाईल स्वारगेट पोलीस ठाण्यात दाखल असलेल्या गुन्ह्यातील असल्याचे निष्पन्न झाले. आरोपीने चोरी केलेले मोबाईल त्याच्या ओळखीच्या मोहम्मद शाहिद इलियास अन्सारी (रा. कोंढवा, पुणे) याला विकल्याचे सांगितले. पोलिसांनी त्याच्या दुकानावर छापा टाकून ७ लाख ४५ हजार रुपये किंमतीचे ४३ मोबाईल आणि एक लॅपटॉप जप्त केला.

अटक आरोपी सतिश शिरोळे हा रेकॉर्डवरील गुन्हेगार असून, त्याच्यावर पूर्वी चोरीचे ६ गुन्हे दाखल आहेत. सदर प्रकरणाचा पुढील तपास पोलीस हवालदार अश्रुबा मोराळे करीत आहेत.

ही कारवाई वरिष्ठ पोलीस निरीक्षक युवराज नांद्रे यांच्या मार्गदर्शनाखाली, सहायक पोलीस निरीक्षक राहुल कोलंबीकर, पोलीस उपनिरीक्षक रविंद्र कस्पटे, पोलीस हवालदार अश्रुबा मोराळे, सचिन तनपुरे, पोलीस अंमलदार सुजय पवार, दीपक खंदाड, हर्षल शिंदे, फिरोज शेख, हनुमंत दुधे, रमेश चव्हाण, प्रशांत टोणपे आणि संदीप घुले यांनी केली.